Apple iPhone တွေဟာ ပုံမှန်အားဖြင့် Security ပိုင်းမြင့်မားတဲ့အတွက် စီးပွားရေးလုပ်ငန်းလုပ်နေတဲ့သူတွေ၊ ကိုယ်ရေးကိုယ်တာအချက်အလက်တွေ Privacy ပိုင်းကို အလေးထားတဲ့သူတွေ ဦးစားပေးရွေးချယ်နေကြတာဖြစ်ပါတယ်။
ဒါပေမယ့်လည်း ပြီးခဲ့တဲ့နှစ်တုန်းက iPhone တွေမှာ Spyware တစ်ခုဖြစ်တဲ့ Pegasus Spyware လိုမျိုး iPhone တွေမှာ ပျံ့နှံ့ခဲ့တာကြောင့် Apple အနေနဲ့ လုံခြုံရေးပိုင်းကို ပိုပြီး အခုအချိန်မှာ အာရုံစိုက်လာပါတယ်။ အခုလည်း iOS 16 Beta 3 Update နဲ့အတူ လုံခြုံရေးပိုင်းကို အဆင့်မြှင့်တင်ထားတဲ့ Feature တစ်ခုကို ထုတ်ပေးလိုက်ပါတယ်။
ဒါကတော့ Lockdown Mode လို့ နာမည်ပေးထားပြီး နောက်ပိုင်းမှာ iPhone တွေအပြင် iPad နဲ့ Mac တွေအတွက်ပါ ထုတ်ပေးသွားမှာဖြစ်ပါတယ်။ အဆိုပါ Lockdown Mode ဟာ Security ပိုင်းကို အမြင့်ဆုံးကာကွယ်ပေးဖို့ ရည်ရွယ်ထားတာဖြစ်ပြီး တချို့သော လုံခြုံရေးကို အထူးအလေးပေးဖို့လိုအပ်တဲ့သူတွေနဲ့ Spyware ဝင်ရောက်နိုင်ခြေမြင့်မားတဲ့သူတွေအတွက် အသုံးပြုဖို့ပိုပြီး သင့်တော်မှာဖြစ်ပါတယ်။
ဘာကြောင့်လဲဆိုရင် Lockdown Mode ကို Enable ပြုလုပ်လိုက်တဲ့အချိန်မှာ iPhone ထဲမှာရှိတဲ့ Application တွေနဲ့ Service တွေက Limitation တွေပိုပြီး ကန့်သတ်လိုက်မှာဖြစ်ပါတယ်။
ဥပမာအားဖြင့် Messages App မှာ Attachment တွေကို ဓါတ်ပုံတွေပဲ လက်ခံနိုင်မှာဖြစ်ပြီး Link Preview တွေကို Block ပြုလုပ်သွားမှာဖြစ်ပါတယ်။ Web Browsing ပိုင်းမှာလည်း Spyware ဝင်ရောက်နိုင်တဲ့ Javascript တွေကိုလည်း Disable ပြုလုပ်သွားမှာပါ။ FaceTime Call တွေမှာလည်း ယခင် ခေါ်ဆိုထားခြင်းမရှိတဲ့သူတွေက ခေါ်ဆိုမယ်ဆိုရင် လုံးဝ Block ပြုလုပ်သွားမှာဖြစ်ပါတယ်။ ဒါတင်မဟုတ်သေးဘဲ ကြိုးဖြင့် ချိတ်ဆက်မှုတွေကိုလည်း Block ထားပြီး Profile တွေကို Install ပြုလုပ်မှုကိုလည်း ပိတ်ထားမှာဖြစ်ပါတယ်။ ဒါကြောင့် လုံခြုံရေးပိုင်းအတွက် အခု Lockdown Mode ဟာ အလွန်အသုံးဝင်တဲ့ Feature တစ်ခုဖြစ်လာမှာပါ။
